Têkoşîna Sara têkoşîneke gerdûnî bû

JIYAN FARAŞÎN / NÛPELDA TÊKOŞÎN / ANF / BEHDÎNAN

Li ser jiyan û têkoşîna Sakîne Cansiz hevrêya wê û Endama Konseya Serokatiya Giştî ya KCK’ê, Elîf Ronahî axivî û got :“Têkoşîna hevala Sara ne têkoşîneke ku tenê bi têkoşîna jinê ya PKK’ê were nirxandin. Ji vê jî wêdetir têkoşîneke gerdûnî ye. „

Elîf Ronahî got, „Hevala Sara berxwedana xwe ya li zindanê, li çiyê jî dewam kir“ û da xuyakirin ku bi danhevî û tecrûbeyên xwe hewl dida bi sekna xwe hevrêyên xwe yên ciwan perwerde bike û hişmendiya jinê xurtir bike.

Rêbera tevgerên jinan

Ronahî diyar kir ku nabe Cansiz tenê bi têkoşîna PKK û PAJK’ê were nirxandin û îşaret bi asta gerdûnî ya têkoşîna wê kir. Ronahî destnîşan kir ku têkoşîna wê bû têkoşîna Roza û Clarayan û ji ber vê yekê 9’ê Çileyê ji bo hemû jinên cîhanê weke roja têkoşînê hate ragihandin.

Ronahî wiha dewam kir: „Têkoşîna hevala Sara ne têkoşîneke ku tenê bi têkoşîna jinê ya PKK’ê were nirxandin. Ji vê jî wêdetir têkoşîneke gerdûnî ye. Bi kîjan daxwaz û kelecanê dest bi têkoşînê kir, bi heman daxwaz, biryardarî û kelecanê heta kêliya dawî têkoşiya. Tevgerên jinan ên cîhanê her wiha hevala Sara weke rêbera xwe qebûl kirin. Jinên Arjantînî hevala Sara weke rêbera xwe qebûl kirin. Vê yekê berpirsyariya me hezar qatî zêde kir û bersiva me wê ji vê re hebe.“

Xwedî derketina li mîrateya wê

Endama Konseya Serokatiya Giştî ya KCK’ê Elîf Ronahî destnîşan kir ku dema ku jin mîna Cansiz jiyan, mîna wê hîs kirin û li her warê jiyanê tevlî nava têkoşîna azadiyê bûn, hingî wê têkoşîna jinên bindest ên cîhanê gerdûnî bibe.

Ronahî got, „Di şexsê hevala Sara de ji bo bersivê bidin bîranîna hevalên Rojbîn, Ronahî, Sêvê, Pakîze, Fatma, Delal û hemû hevalên şehîd, di çarçoveya hevrêtiya rast de em ê vê têkoşînê teqez bi ser bixînin, azadiyê diyarî dayik û jinên Kurd bikin û bikin ku di nava civakeke exlaqî-polîtîk de bijîn. Ji ber vê yekê em li bendê ne ku hemû jinên li Rojhilata Navîn di xeta hevala Sara de bijîn, têbikoşin, vê biryardariyê nîşan bidin û tevlî bibin.