Rojawan de xebatkarê weşî yê şorişî resenî

Akademîya Weşîye ya Rojawanî ke Serêkanîyê de ya, seba perwerdeyê tibbî û weşîye alternatîf a. Na akademî tibb û teknolojîyo ilmî ana têhet, zekaya analîtîkî înkar nêkena û muhîmî dana zekaya hîsinî zî. Na akademî ezmûnan red kena û weçînayîşê komelî qebul kena.

Babete ser o Îdareyê Akademîya Weşîye ya Rojawanî ra Zekî Çîyayî qisey kerd û malumat da. 

Çîyayî va ‘ma kitabê Rayberê Şarê Kurdî Abdullah Ocalanî yê ‘Do Senî Bêro Cuyayîş’ ra vejîyayî rayîr û ‘ma senî eşkenî bi hawayo weşîye bicuyî’ ser o vindetî û  wina domna: “Ma tena hetê ci yê fîzîkî nê, hetê ci yê psîkolojîk û têkilîyê mîyanê komelî zî esas girewt. Ma 2009 de grûbêka ke tede akademîsyen û sewbîna zaf kesî estbîy, awan kerd. 2010 de Amed de Komxebatêk ame viraştiş û Ewropa û Kurdistanî ra xeylê kesî beşdar bîyî. O wext netîceyêk vejîya orte û goreyê netîceyî do modelê rêxistinbîyayîşî, komun û meclîsî biameyênê awankerdiş û beşa akademî tena bi mekteban sînordar nêmendêne.”

Ma ezmunan esas nêgênî 

Çîyayî dewamê qiseykerdişê xo de va ‘Seba ke Serêkanîyê kulturê Til Xelefî cuyeno û no kultur zî destpêkê cuya cayî yo’ û wina dewam kerd: “Ganî sey Çaxê Neolîtîkî ma tîya ra bidî destpêkerdiş. Bedenê Tîamate Kurdistan de bî herre û hesirê çimanê aye Firat û Dîcle awan kerd û ewro hetê YPJ û KONGRA STARÎ ra no yeno ganîkerdiş. Sey ci ganî ma kulturê Til Xelefî tîya de ganî bikerî. Keso ke ziwan û kulturê şarê xo nas nêkero û bibo doktor, sernêkeweno. Ma mefhûmê doktorî zî raşt nêvînenî. Ez vana şîfakar, yan zî xebatkarê weşîye. Seba ke heme wendekarê Hîpokratî camêrdan ra pê yenî, ma sondê ci esas nêgirewt. Ma sondê xo esas gênî. Weşîye cuye bi xo ya; cok ra merdim nêşêno cuya kesêko 18-20 serreyî bi ezmunêko 2 saetî dîyar bikerî. Cok ra ma ezmunan esas nêgênî.”

HÎVDA HEBUN / ANF / SERÊKANÎYÊ