Sûr vera rijnayîşî bi DÊS

Qezaya Amed Sûr de, qedexeyê 28ê Mijdare 2015 ra dima, bi hezaran keyeyî amey rijnayîş, taxî amey talankerdiş. Çarçoveyê qedexe de taxanê Lalebey û Alîpaşa de zî qerarê rijnayîşê xêlê keyeyan ame dayen. Verîya çend rojan wesayîtanê zirxî ra anonsê “Keyeyanê xo veng/tol bikerê” amey kerdiş. Herzewbîn amebi dîyarkerdiş ke 21ê Gulane de aw û ceyranê hurdî taxan do bîro birnayîş. 

Raştê xoverdayîşî amey

Ekîpmanê rijnayîşî vizêr seatanê sodir de seba rijnayîşê keyeyanê taxanê Lalebey û Alîpaşa kewtî hereket. Awa taxan amê birnayîş, polîsan hurdî taxî girotî bin ablûqa û waştî bi kepçe û wesayîtanê karî bikewo taxan. Sûrijê ke nayî rê destûr nêday, xo kerdî mertal û pawitişê taxanê xo girotî. Ser xoverdayîşê taxijan kepçe û wesayîtê karî peyser ancîyay. 

‘Wa bîrê sifte ganê mi bigîrê’

Welatijê bi nameyê Mehmet Ak’î hêrîşan rê nêrazîbîyayîş damûsna û va, “Wa sifte bîrê canê mi bigîrê, dima ra keyeyê mi biveşnê.” Ak’î vist vîrî ke ê dûştê rijnayîşî de xoverdayîşî de qerardarê û da zonayen ke, pêrokîn serpirodayîşê înan yê meqamanê fermî bi behaneyê “Ma selahîyetdar nîyê” bê netîce mendî. Ak o ke bi persa “Erdogan ma ra se wazeno?” nêrazîbîyayîşê xo ard ziwan wina va: “Eke o musluman o, ma zî musluman ê. Ma nêwazenê bibê mexdûr, nê însanan ra se wazenê. Ma keyeyanê xo nêdanê, nêdanê, nêdanê.”

Ensarîoglû mesûl o

Mehmet Ak’î vist vîrî ke Erdoganî verîya 10 serran vatibê dê Sûrî birijnê û newe ra înşa bikerê û vilayê şarî bikerê û va, ‘Ez nêdana, wa bîro sifte ganê mi bigîro dima ra Sûrî birijno. Bado ke mi kişt, wa bîro keyeyê mi zî biveşno. Wellehî bîllahî ez nêdana.”  Akî qerarê rijnayîşê 2 taxanê Sûrî ra Parlementerê AKP yê Amedî Galîp Ensarîoglû mesûl girot û aşkere kerd ke bi rijnayîşî wazenê dewlemendîya Sûr bigîrê dest. 

Neyra tepya tenya xoverdayîş esto

Cinîya bi nameyê Kafîye Sûn ke taxa Alîpaşa de roşena zî aşkere kerd ke kes nêşeno înan keyeyê ci ra bivejnê. Sûn da zonayen ke ê dê neyra tepya zî vera hêrîşan xover bidê û bi nê vatenan qiseyanê xo qedêna: “Eke hewce bikero, ma dê xo bierzê binê kepçe. Ma dê quwetê xo bikerê yewe û keyeyanê xo terk nêkerê. Ma dê heta peynî xover bidê. Neyra tepya tenya xoverdayîş esto. Ma dê roja Dişeme zî bimeşê ver bi walîtîye. Kesê ke nêwazenê Sûr bîro rijnayîş, ganî piştî bidê ma. Ewro tîya yeno rijnayîş, do meşt cayekê bîn bîro rojnayîş.  

AMED