TARIQ HEMO: Efrîn: Keleha Mirovayetiyê li dijî faşîzma serdemê

TARIQ HEMO

Berxwedana Efrînê 3 heftî li dû xwe hîşt. Li hemberî artêşa dewleta Tirk û çeteyên wê, cîhadistên El Qaîda û komên kirêkirî, şoreşgerên Kurd, destanên mezin dinivisînin. Erdogan, an Hitlerê serdemê, bê çare maye. Wî qaşo ji bo dagirkirina Erfînê 3 rojan danîbûn. Pişt re, Hitlerê Enqere digot, ewê di 3 rojên din de Minbic, 3 din jî Qamişlo bigre dest. Bi vê yekê re, wê artêşa hov, heta sînorên Iraqê biçe. An serokê faşîzma nûjen, pîlan dikir ku tevahiya Rojava û Şingalê di heftiyekê de bistîne!.

Ev 3 heftî Efrîn li himberî dewleta hevkara El Qaîdayê ya bi teknîka şer a NATO yê parastî, li ber xwe dide. Artêşa Tirkiyê û çeteyên wê nikarîbûn ji bilî sed metroyan bi pêş ve herin. Ev çend sed metro jî, ji bo esker û çeteyan dojeh e. Ew li jêr agirê YPG û YPG´iyan disotin. Bi rokêtên ciwanên Efrînê di hundurê tank û erebeyên zirxî de dibin xulî û pîşo. 

Beriya êrîşa dewleta Tirk li dijî Efrînê, her kes di nava fikaran de bû. Gelo dê Efrîna ku ev 7 sal li jêr ambargo û êrîşan, karibe li ber xwe bide û li dijî artêşa Tirkan û çeteyên wê raweste. Dost û hevalên doza Rojava û hemû demokratên ku li dijî faşîzma Erdogan disekinin, ev metirsî dianîn ziman. Ew dost bi qasî ku bi vîna berxwedanê ya YPG û YPJ bawer bûn, lê di heman de ditirsiyan ku artêşa dewleta hevkara El Qaîdayê hemû çekên qedexe bikar bîne, da ku vê vînê têk bibe. 

Murat Karayilan endamê Komîteya Rêveber ê KCK beriya ku şer biqewime, mizgîniya serkeftinê ya gelê Efrînê li dijî terora dewleta Tirk da. Karayilan got: „Ji eskerên Tirkiyê netirsin. Ew kesên tirsonek û bê moral in. Em wan nas dikin. Piraniya wan hema ku şer germ bû, çavên wan li revê ye û serkeftinê di xelasiya canê xwe de dibînin. Li jêr guleyên gerîla tim reviyane, giriyane û tar û mar bûne. Dema ku ji şer vedigerin jiyana sivîlan, hemû bi nexweşiyên pisîkologî dikevin, hin dîn dibin, hin di nava trawmayê de pûç dibin, hîn jî xwe dikujin.“ 

Wek îro beriya 10 salan şervanên azadiyê derbeyek mezin li xirûra dagirkeriya Tirkiyê xistin. Di destana Zapê de hemleya şer ya artêşa AKP´ê têk çû û biryara xwevekişînê ji aliyê serkêşiya artêşê bi awayekî lezgîn û suprîz hat dayin. Jixwe artêşa Tirkan wek her car behsa têkçûna xwe nekir, lê qaşo biryara xwevekişînê „piştî pêkanîna hemû armancan û têkbirina PKK“ hate derxistin. Lê her kesî dizanîbû ku artêşa dewleta Tirk di warê eskerî de li Zapê rastî têkçûnek mezin hatin. Bi sedan eskerên wê hatin kuştin. Yên di reva ji bo xelasiya canê de bûn, hawara wan diçû ezmanan. Gelek jî di nava berfê de qerisîn, an jî piştî vegera malên xwe, dîn û şêt bûn. Destê tirsê li wan ket!.

Îro Efrîn heman iradeya berxwedanê ya Zapê dubare dike. Efrîn berxwedana serkeftinê dimeşîne. Ew ê pozê Erdogan û hevalbendên wî, çeteyên El Qaîdayê bişkîne. Loma em dibînin bê çawa artêşa Tirkiyê ji tirsa vê binkeftinê bi belafiran û topan êrîşî sivîlan dike. Ew bi riya komkujiyan û siyaseta sotandina erd û ezmanê Efrînê, dixwaze vîna bexwedanê ya vî gelî têk bibe. 

Dewleta Tirk di vî şerê qirêj de cesaret û moralê ji welatên Ewrûpa û Rusiyayê digire. Erdoganê ku bûyê Hitlerê vê demê cesaretê ji durûtiya Ewrûpa û xiyaneta Rusiya ya sozên xwe, digire. Erdogan ji ber vê bêdengiya Ewrûpa û Rûsiya, hevkariya xwe ya bi El Qaîdayê xurtir dike û qet hesabê kesekî nake. Bi riya El Qaîdayê gefan li Ewrûpa dixwe û welatiyên wê bi şandina bi hezarên cîhadîstan tehdîd dike. Ewrûpa jî, bê pirensîp tev digere û carek din dibe sedema berizkirina faşîzmê û destûrdayina komkujiyan.

Dema ku Hitlerê Enqerê ji aliyê Ewrûpa ve neyên ambargokirin, sûcdarkirin û cezakirin, ew ê vê hemleya komkujiya Kurdan û wêrankirina Efrînê dewam bike. Dema ku mirovekî wek Papa destê xwe dirêjî destê kujêrekî mîna Erdogan bike û hemû kiryarên wî yên li dijî mirovayetiyê ji bîr bike, di nav de kuştina bi hezaran Xiristiyan û wêrankirina dêran, dê Erdogan vê yekê wek „lempa kesk“ fêhm bike û hîna zêdetir kuştin û terorê bimeşîne.

Efrîn niha li ber xwe dide. Efrîn ne tenê ji bo xwe şer dike. Efrîn îro şerê şaristanî û mirovayetiyê li dijî teror û tariyê dike. Efrîn eger bi ser bikeve, dê tevahiya mirovayetiyê ji terora Hitlerê Enqerê biparêze. Efrîn dê projeya “Xilafetê” ya ku Erdogan bi El Qaîdayê û hemû hêzên cîhadîstan re pîlan dike, beravêtî bike. Efrîn dê Erdogan qelis bike, xewna wî ya “Xilafeta Osmanî” têk bibe û nehelê ku Hitlerê demê bigihêje wê asta ku sivîlan li Ewrûpa bi riya van cîhadîstên xwe bikuje.   

Efrîn temsîla eniya şarestanî û Mirovayetiyê li himberî xeta teror û komkujiyan dike. Destekdayina berxwedana Efrînê pêdiviya hemû mirovên azad û demokrat in. Îro li Efrînê şerekî felsefî û bîrdozî jî heye. Şerekî di navbera eniya mirovatiya nûjen a li ser nirxên azadî, wekhevî û edaletê hatiye avakirin, li himberî eniya teror, komkujî û jiholerakirina hemû cihêrengiyan. Şerekî di navbera rengê reş ê terora “cîhadê” û rengîniya bi hevrejiyan û biratiya gelan.

Îro Efrîn jiyan, namûs û keda her welatiyekî li her çar aliyên cîhanê, li dijî fikrekî totalîter, kîndar û hevkarê terorê diparêze. Xwedîderketina li Efrînê, xwedîderketina li hemû têkoşîna mirovayetiyê ya li dijî faşîzimê ye…