Ma azadîya Ocalanî wazenî

Rayberê Şarê Kurdî Abdullah Ocalanî ser de tecrîdo ke nimûneyê ci ti cayê dinya de nêameyo dîyayîş û eşnawitiş yeno ramitiş. Ocalan 2011 ra nata nêşêno avûkatanê xo reyde, 2015 ra nata nêşêno Heyetê Îmrali û 2016 ra nata zî nêşêno keyeyê xo reyde pêvînayîş bikero. 

Bitaybetî verê cû zî derheqê weşî û ewleyîya ci de tayê xeberî medyaya komelkî de ameybî parekerdiş û hewl dîyabî kurd û dostê kurdan bimusnî xeberanê winasîyan. Verê nêyî de kurdî û hetgirê demokratîke raşteyan de seba weşî, ewleyî û azadîya Ocalanî çalakîyan organîze kenî. 

Babete ser o Endama Îdarekarîya RJAKÎ Destan Mehrûfe û Berpirsîyarê Komîteya Têkilîyê Dîplomasî ya TEV-DEMî yê qezaya Til Hemîsî Heyal El Xiweyîrî qisey kerdî. Destan Mehrûfe va ‘xeta ma yê xebatan bingeyê xo fikir û felsefeya Rayber Abdullah Ocalanî ra gêna. Çimkî Rayberê ma çareserîya heme probleman çareserkerdişê problemê cinîye de vîneno. Heta heme cinîyî azade nêbî, ma nêşênî biresî azadîye. Nimûneya nêyî zî tewr baş Rojawan de ame dîyayîş. Ma fikranê Rayber Apoyî sey fikrê xo vînenî û goreyê înan têkoşînê xo domnenî.”

Ma xo berpirsîyar vînenî

Mehrûfe qiseykerdişê xo de bale ante qerarê ke Kongreya 4. ke 5ê çileyî de bajarê Silêmanî de virazîyaye de ameyî girewtiş ser û wina va: “Kongre de babeta esasî ke ma ser o munaqeşe kerd, azadîya Rayber Apoyî bîye. Rayber Apo rayberê heme cinî û merdimîye yo. Çimkî Rayber Apoyî qalibê koletîya cinîye şiknayo. Cok ra ma seba azadîya ci bi zerrî û can xebetîyenî. Ma xo azadîya Rayber Apoyî de berpirsîyar vînenî û ma do heta azadîya ci têkoşîn bidî. 

Ma bi saya fikrê Ocalanî resayî nê dûştî

Heyal El-Xiwêrî zî va ‘ma saya fikrê Ocalanî de ewro Vakurê Sûrîye de cuya ortaxe û biratîya şaran awan kenî’ û wina dewam kerd: “Fikrê Ocalanî vengdayîşo azade û demokrasî kenî; cok ra ma azadîya ci wazenî. Ganî rêxistinê heqê merdimîye Tirkîya ser de zextan bikerî ke rewşa Ocalanî zelal bikero û pêvînayîşî bêrî kerdiş. Reyna wina bibo ke Tirkîya goreyê qanûn û qeydeyanê mîyanneteweyîyan hereket bikero.”

Ganî ti kes bêveng nêmano

Heyal El-Xiwêrî qala tecrîdî kerd û wina va: “Amancê tecrîdî o yo ke fikrê û hewldayîşê Ocalanî sînordar bikero û nêverdo vila bibo yo. Çimkî nê fikrî seba şaranê bindestan hêvî yî. Fikrê Ocalanî wina kerd ke bindestî xo ra bawer bikerî. Ewro Vakurê Sûrîye de xeta hîrêyine aver şona û na xete goreyê fikrê Ocalanî aver şona. Sey şarê Til Hemîsî bawerîya ma bi fikrê Ocalanî esto. Ganî ma esaretê Rayberê xo qebûl nêkerî û reyna ganî ti kes vera na rewşe de bêveng nêmano.” 

NAVENDÊ XEBERAN