Ganî her kes şêro sindoqan ser

Hemsereka Pêroyî ya HDPyî Fîgen Yuksekdag a ke Zîndanê Tîpa Fyî yê Kandira de tewqîfkerde ya, seba referandûmo ke do roja yewşeme bêro viraştiş mesaj erşawite. Hemsereka Pêroyî ya HDPyî Yuksekdage mesajê xo de bale anta muhîmîya referandûmî ser. 

Yuksekdag vist vîrî ke referandûmî ra pey do dîyar bibo, ka Tirkîya do bivejîyo roşnayî yan zî tarîtî de bimano“ û ard ziwan ke yê ke no referandûmî de rey bidî dê na rewşî dîyar bikerî.  

Reya serkewtişî akero

Yuksekdage dewamê mesajê xo de vato ‘proseso ke qet tarîx de nimûneya ci nêameyo dîyayîş de ma ver bi referandûmî şonî’ û wina domnaya: “Ma proseso ke vatişê nê qedexe, yê ke vanî zî tewqîfkerde yî de yî. Cok ra ganî ma bi hawayo qerardarî û înadê faşîzmî de ma vajî nê. Ma kura de benî ma bibî, ma do eynî cesaret û hêvî de bêrî têhet. Ma do heme cayan de bi vengêko seyyewbînanî biqîrî. Cîyayîya ma se bena wa biba, ma do eynî deyîran bi eynî vatişan vajî. Seba ke ma heme qezenç bikerî, ma do vajî nê.”Yuksekdage peynîya mesajê xo de wina vato: “Seba nêyî ganî ma heme wezîfeyo ke keweno milê ma ser de bikerî. Ez veng dana şarê ma wa bi ciwan, cinî, camêrd û extîyarê xo vajî nê. Bêrê ma yewna rey nîşan bidî ke bi zorî rindî nêbeno û ma do rindîye û ameyoxe bi reyanê xo qezenç bikerî. Ez veng dana heme şaranê Tirkîya ke wa şêrî sindoq ser û reya xo bixebetnî û raya ma ya serkewtişî akero. Bi hêvî, xoverdayîş û pîya bimanî…”